Праваахоўным органам вядома, як выглядае мужчына, які нанёс смяротнае нажавое раненне маладому салдату на беларускай мяжы. Яго асабістыя звесткі высвятляюцца, у тым ліку ў мігранцкай супольнасці, піша Reform.news са спасылкай на Rzeczpospolita.
Момант нападу на 21-гадовага радавога Матэвуша Сітка, які быў паранены нажом, прымацаваным да палкі, калі ён падыходзіў да плота для ліквідацыі прарыву, зафіксавалі камеры Памежнай службы, устаноўленыя на мачтах. На відэа бачны злачынец, хоць фатаграфія размытая. Пасля праходжання спецыялізаванай апрацоўкі стане ясна, наколькі выразнай будзе выява яго твару.
«У нападніка смуглявая скура, што можа азначаць, што ён не афіцэр беларускіх службаў, а адзін з мігрантаў, якія знаходзяцца на беларускім баку», — расказаў выданню чалавек, знаёмы з гэтым запісам.
Нанёсшы нажавое раненне салдату, нападнік уцёк углыб Беларусі.
Польскія ўлады разлічваюць апазнаць нападніка з дапамогай мігрантаў, якія цяпер знаходзяцца ў памежных цэнтрах.
Нагадаем, удзень 6 чэрвеня ў Вайсковым медыцынскім інстытуце ў Варшаве памёр польскі вайсковец. Яго ўдарыў нажом у грудзі мігрант падчас чарговай спробы прарыву беларуска-польскай мяжы 28 траўня.
МЗС Польшчы запатрабавала ад Беларусі ідэнтыфікаваць і выдаць падазраванага ў забойстве польскага салдата.