Аляксандр Лукашэнка паставіў перад спецыялістамі пытанне пра наяўнасць у краіне рэдказямельных металаў. Адпаведную заяву ён зрабіў 4 сакавіка, прымаючы кадравыя рашэнні і акрэсліваючы ключавыя задачы для профільнага блока ва ўрадзе, які курыруе віцэ-прэм'ер Юрый Шулейка, паведамляе яго прэс-служба.
Лукашэнка зрабіў акцэнт на геалагічнай разведцы: «Найактуальнейшая тэма».
«Кажуць, што ў нас у адкладнях ёсць рэдказямельныя мінералы. Трэба разведаць і астатняе: і хімія, і нафта, і газ, і іншае. Я ставіў адпаведную задачу перад адпаведным міністрам», — сказаў ён.
На яго думку, геалагічная разведка ў краіне развітая недастаткова, знаходзіцца на нізкім узроўні. А тэматыка пошуку рэдказямельных металаў выпадае з поля зроку айчынных спецыялістаў.
«Рэдказямельныя металы выгаворвае толькі Трамп у Злучаных Штатах Амерыкі. Вы над гэтым пакуль не задумваліся. Іх шмат не бывае ў зямлі. Можа, у нас не менш, чым у іншых?» — паставіў перад спецыялістамі пытанне Лукашэнка.
Звяртаючыся да профільнага віцэ-прэм'ера, ён працягнуў: «Таму міністру прыродных рэсурсаў і аховы навакольнага асяроддзя ўпірацца разам з вамі давядзецца добра. Гэта будучыня. Трэба капаць, трэба глядзець, што ёсць у нас у зямлі».
Нагадаем, пра рэдказямельныя металы ў свеце загаварылі пасля таго, як з пачатку лютага 2025 года прэзідэнт ЗША Дональд Трамп настойліва патрабуе ад Украіны «гарантаванага доступу» да некаторых карысных выкапняў гэтай краіны ў абмен на амерыканскую дапамогу.